Ногиронлиги бўлган болалар учун ижтимоий такси хизмати 14 та шаҳарда йўлга қўйилди

Баҳорда Тошкент, Самарқанд ва Андижонда синов тариқасида йўлга қўйилган ижтимоий такси хизмати эндиликда бутун мамлакат бўйлаб кенгаймоқда. Яна 11 та шаҳар – Бухоро, Қарши, Фарғона, Урганч, Қўқон, Жиззах, Наманган, Навоий, Нукус, Гулистон ва Хивада ҳам лойиҳа ишга тушди. Шу тариқа, бугунги кунда умумий ҳисобда 14 та шаҳарда ногиронлиги бўлган болалар учун махсус такси хизмат кўрсатмоқда.

 

Лойиҳа Ўзбекистон Республикаси Президенти ҳузуридаги Миллий ижтимоий ҳимоя агентлиги томонидан Yandex Uzbekistan билан ҳамкорликда амалга оширилмоқда. Унга кўра, ногиронлиги бўлган болалар мактабга бориб-килишида ижтимоий таксидан фойдаланиш имконига эга бўлади. Бу хизмат ота-оналарнинг кундалик ташвишларини камайтириши ва болаларнинг ўқишга бемалол қатнашига ёрдам бериши кутилмоқда.

 

Давлат ҳар бир бола учун ойига 494 400 сўмгача транспорт харажатларини қоплаб беради. Компенсация миқдори имтиёз турига қараб сафар қийматининг 60 ёки 100 фоизини ташкил қилиши мумкин. Буюртмалар Yandex Go иловаси орқали амалга оширилади. Унда ногиронлар аравачасидан фойдаланадиган йўловчилар учун махсус опциялар мавжуд. Муҳими, Yandex Go бу хизматдан комиссия олмайди – маблағ тўғридан-тўғри ҳайдовчиларга йўналтирилади.

 

Мутасаддиларнинг қайд этишича, лойиҳа оддий транспорт хизматидан кўра кенгроқ ижтимоий аҳамиятга эга. Чунки у нафақат болаларнинг хавфсиз ва қулай қатновини, балки ота-оналарнинг ҳам ўзини ёлғиз ҳис қилмаслигини таъминлайди. Шу боис ижтимоий такси дастури кўплаб оилалар учун катта енгиллик бўлиши кутилмоқда.