Ўзбекистонликлар Россияга “загран” паспортсиз кириши мумкин
ТИВ маълумотига кўра, янги тартиб жорий этилиши учун зарурий давлатлараро келишув ишлари олиб борилмоқда.
Ўзбекистон ва Россия ўртасида фуқароларнинг икки мамлакат ҳудудига кириши учун қўшимча қулайликлар жорий этилиши кутилмоқда. Жумладан, томонлар фуқароларга ташқи (“загран”) паспорт талаб қилинмаган ҳолда, ички паспорт ёки ID-карта орқали чегарадан ўтишга рухсат бериш масаласини муҳокама қилмоқда.
Ташқи ишлар вазирлиги матбуот котиби Ахрор Бурхоновнинг таъкидлашича, ҳозирда зарурий давлатлараро келишув ишлари олиб борилмоқда. “Музокаралар давом этмоқда, айрим техник жиҳатлар бўйича келишувга эришилиши керак. Шу сабабли ушбу тартибнинг қачон амалиётга жорий этилиши ҳақида ҳозирча аниқ сана айтиш имконияти йўқ”, — деди у.
Эслатиб ўтамиз, 2025 йил май ойида Президент Шавкат Мирзиёевнинг фармонига мувофиқ, Ўзбекистон Россия, Қозоғистон ва Озарбайжон фуқароларига ички ҳужжатлари орқали мамлакатга қисқа муддатли ташриф буюриш имкониятини яратиш масаласини кўриб чиқаётган эди.
Айни пайтда Ўзбекистон ва Россия ўртасида визасиз тартиб амал қилади. Бироқ икки давлат фуқаролари учун ташқи паспорт ва белгиланган муддатларда вақтинчалик рўйхатдан ўтиш мажбурияти сақланиб қолмоқда. Янги келишув амалга ошса, бу тартиб сезиларли даражада соддалаштирилади.
