Пайнет қурилмасини ўғирламоқчи бўлган “шоввозлар” ушланди
Қурилма ичида 5 миллион 263 минг сўм пул бўлгани қайд этилган.
Навоийда пайнет қурилмасини ўғирлашга уринган уч нафар йигит қўлга олинди. Бу ҳақда вилоят ИИБ ахборот хизмати раҳбари Файоз Қосимов маълум қилди.
Аниқланишича, 22–24 ёш оралиғидаги, бир-бирини олдиндан таниш уч нафар шахс тунги пайт Тараққиёт маҳалласи ҳудудида жойлашган пул жўнатиш қурилмасига “ҳужум” қилган. Улар юзларига ниқоб, қўлларига тиббий қўлқоп кийиб, давлат рақамисиз автомашина ёрдамида қурилмани олиб кетган. Қурилма ичида 5 миллион 263 минг сўм пул бўлгани қайд этилган.
Вилоят ИИБ тезкор-қидирув хизмати ҳамда жиноят қидирув бошқармаси ходимлари олиб борган тезкор чоралар натижасида гумондорлар шу туннинг ўзида навбатдаги режани амалга ошириш чоғ‘ида қўлга олинган.
Улар устидан Жиноят кодексининг тегишли моддалари бўйича иш қўзғатилган. Шунингдек, етказилган 36 миллион 763 минг сўм миқдоридаги моддий зарар уларнинг зиммасига юклатилган.
