Сурхондарёда ноқонуний экстремистик гуруҳ фаолияти фош этилди
ДХХ Zamon.uz’га воқеа тафсилотларини маълум қилди.
Давлат хавфсизлик хизмати Сурхондарё вилояти бўйича бошқармаси томонидан олиб борилган тезкор-қидирув тадбирлари натижасида, Ўзбекистон Республикаси Олий суди қарорига мувофиқ фаолияти тақиқланган “Тавҳид ва жиҳод катибаси” террорчилик ташкилоти тарафдорларидан иборат ноқонуний гуруҳ фош қилинди.
Аниқланишича, ушбу гуруҳ аъзолари диний йиғинлар ниқоби остида террорчилик ташкилотлари мафкурачиларининг материалларини тинглаб, Сурия давлатига бориб жангариалар сафига қўшилиш, шунингдек, ўзларини портлатиш орқали “шахид” бўлиш масалаларини муҳокама қилишган.
Шунингдек, улар ижтимоий тармоқлар орқали хориждаги террористлар билан алоқа ўрнатиб, портловчи моддалар ва заҳарли кимёвий воситаларни тайёрлаш бўйича электрон қўлланмалар орқали саботаж ҳаракатларини амалга оширишни режалаштиришган.
Суд текширувлари давомида жиноят гуруҳининг айрим аъзолари илгари ҳам экстремистик фаолият учун жавобгарликка тортилиб, уларга нисбатан аввалги жараёнларда енгиллик қўлланилгани маълум бўлди.
Натижада, 20 нафар фаол иштирокчига нисбатан жиноят иши қўзғатилиб, улар Жиноят кодексининг тегишли моддалари бўйича айбли деб топилди ва қилган жиноятларига қараб 6 йилдан 13 йилгача озодликдан маҳрум этилди. Гуруҳнинг айрим аъзоларига эса инсонпарварлик тамойиллари асосида енгиллик берилди.
