Жарима баллари тизими сабаб қоидабузарликлар 58 фоизга камайди
ЙҲХХ маълумотига кўра, тизим ишга тушганидан бери ҳайдовчилар орасида интизом ошган.
1 июндан йўл ҳаракати қоидаларини бузганлик учун жарима баллари тизими ишга туширилганидан кейинги уч ойда 60 мингдан ортиқ ҳайдовчи балл олган. Бу ҳақда Йўл ҳаракати хавфсизлиги хизмати маълум қилди.
Таҳлилларга кўра, ҳайдовчилар орасида 5 балл тўплаганлар 4 нафар, 4 баллгача жамғарганлар 14 нафар, 3 баллга етганлар 129 нафарни ташкил этди. 2 балл олганлар сони қарийб 5 минг, 1 баллга тушганлар эса 64 мингга яқин. Шу билан бирга, мамлакатдаги 9 миллион 325 мингдан зиёд ҳайдовчи умуман жарима балли олмагани қайд этилган.
Тизим жорий этилгандан бери қоидабузарликлар кескин камайган. Июнь-август ойларида 167 мингта қоидабузарлик аниқланган бўлиб, бу 2024 йилнинг шу даврига нисбатан (285 мингта) 58 фоизга кам.
Шунингдек, ҳайдовчи айби билан содир этилган йўл-транспорт ҳодисалари сони ҳам 36 фоизга қисқарган. 2024 йилда 531 та ҳодиса қайд этилган бўлса, жорий йилда бу кўрсаткич 338 тани ташкил этган.
