Ўзбекистон илк бор халқаро кончилик кўргазмасида қатнашмоқда

Мўғулистоннинг пойтахти Улан-Батор шаҳрида навбатдаги Mining Week & MinePro 2025 – тўртинчи халқаро кончилик кўргазмаси бўлиб ўтмоқда. Ушбу нуфузли анжуман кончилик соҳаси бўйича минтақадаги энг йирик тадбирлардан бири сифатида эътироф этилади ва у кон саноатининг бугунги ютуқлари ҳамда истиқболдаги имкониятларини намойиш этишга хизмат қилади.

 

Мазкур кўргазмада илк бор Ўзбекистон Республикаси расмий делегацияси кенг кўламда иштирок этмоқда. Жумладан, Тоғ-кон саноати вазирлиги, «Навоийуран» давлат корхонаси, "Uzbek Overseas Geology Company" хорижий геология компанияси, «Навоий» КМК, «Олмалиқ» КМК, "Ўзбекистон металлургия заводи" ҳамда "Ўзбекистон Технологик металлар комбинати" ўз стендлари билан қатнашиб, мамлакатимизнинг бой табиий ресурслари, илғор геология-қидирув ишлари, кончиликдаги замонавий технологиялар ва ишлаб чиқариш салоҳиятини кенг жамоатчиликка намойиш этмоқдалар.

 

Кўргазмада Ўзбекистон компаниялари хорижий компаниялар билан танишув учрашувларини ўтказиб, ўз имкониятлари ва истиқболдаги ҳамкорлик йўналишлари ҳақида суҳбатлашдилар.

 

Жорий йилда ўтказилаётган Mining Week & MinePro 2025 кўргазмасида 14 давлатдан 300 га яқин йирик ва кичик компаниялар иштирок этмоқда. Анжуман доирасида халқаро конференциялар, панель муҳокамалар, инновацион тақдимотлар ва кооперация учрашувлари ташкил этилган бўлиб, улар кончилик саноатида юқори самарадорликка эришиш, экологик барқарорликни таъминлаш ҳамда инвестиция муҳитини яхшилаш масалаларига қаратилган.

 

Мазкур нуфузли тадбир Ўзбекистон учун ўз кончилик ва металлургия салоҳиятини кенг тарғиб қилиш, хорижий инвесторлар ва етакчи компаниялар билан узоқ муддатли ҳамкорлик алоқаларини йўлга қўйиш, шунингдек, соҳада замонавий ва инновацион ёндашувларни жорий этишда муҳим платформа бўлиб хизмат қилмоқда.