Рецепт билан бериладиган дорилар энди электрон шаклда тайинланади
12 декабрдан бошлаб “Электрон рецепт” тизими тўлиқ кучга киради.
Ўзбекистонда рецепт асосида бериладиган дориларни электрон шаклда ёзиш тартиби жорий этилди. Ҳукумат қарорига биноан, шифокор томонидан тасдиқланган рецепт автоматик тарзда “Электрон рецепт” модулига узатилади ва Соғлиқни сақлаш вазирлиги ахборот тизимига уланган дорихоналарда электрон шаклда кўринади.
Электрон рецептда дори воситасининг номи, дозаси, қабул қилиш усули ва муддати киритилади. Ҳужжат QR код билан тасдиқланади ва барча маълумотлар беморнинг электрон тиббий картасига қайд этилади. Дорихона фармацевтлари дориларни беморга топширар экан, қадоқлаш муддати ва бошқа муҳим тафсилотларни белгилайди. Шифокор эса ёзилган дориларни онлайн кузатиб бориши мумкин бўлади.
Мазкур тартиб тиббий кўрсатма бўлмаган ҳолларда, мамлакатда рўйхатдан ўтмаган дорилар ҳамда наркоз воситаларига нисбатан қўлланилмайди. Электрон рецептнинг тўғри юритилиши Соғлиқни сақлаш вазирлиги ва унинг ҳудудий бўлинмалари томонидан назорат қилинади.
Низом 2025 йил 12 декабрдан кучга киради. Мутахассисларнинг фикрича, ушбу тизим дорилар бозорида шаффофликни ошириши, шифокорлар томонидан кераксиз дори ёзилишининг олдини олиши ҳамда контрабанда маҳсулотлар савдосига чек қўйиши кутилмоқда.
