Тошкент иссиқлик электр марказида мазутдан умуман фойдаланилмайди

Тошкент иссиқлик электр марказида эндиликда мазут ёқилғисидан умуман фойдаланилмайди. Бу ерда электр ва иссиқлик энергияси фақат табиий газ асосида ишлайдиган замонавий қурилмалар ёрдамида ишлаб чиқарилмоқда.

 

Давлат раҳбарининг ташаббуси билан 2024-йилда марказда умумий қуввати 64 МВт бўлган янги газ-турбиналари ишга туширилган. Ушбу қурилмалар орқали йилига 515 млн кВт⋅соат электр ва 630 Гкал иссиқлик энергияси пойтахт аҳолиси ҳамда иқтисодиёти эҳтиёжлари учун ишлаб чиқарилмоқда.

 

Экологик хавфсизлик ҳам марказ эътиборида. Ҳудудда жойлашган 3 та замонавий газ-турбинали қурилмага экопостлар ўрнатилиб, атмосферага чиқарилаётган газлар доимий равишда мониторинг маркази томонидан кузатилиб, таҳлил қилинмоқда. Шунингдек, “Иссиқлик электр станциялари” АЖ ва Туркиянинг “Iltekno” компанияси ҳамкорлигида Чилонзор, Олмазор ва Сергели туманларида когенерация марказлари қурилиб, уларда ҳам сўнгги технологиялар асосида экологик хавфсиз энергия ишлаб чиқариш йўлга қўйилди.

 

Келгусида Мирзо Улуғбек, Юнусобод, Шайхонтоҳур, Учтепа, Миробод, Яшнобод ва Янгихаёт туманларида ҳам худди шундай қурилмалар барпо этилиши режалаштирилган. Шу билан бирга, марказ шаҳар экологиясини яхшилашга ҳисса қўшмоқда: фақатгина 2025-йилда “Яшил макон” умуммиллий дастури доирасида 5 минг туп манзарали дарахт экилди.