“Ватанга қайтариш” акцияси доирасида 15 давлатдан 1300 нафар ўзбек фуқароси олиб келинди
Қайтарилганлар орасида аёллар, болалар ва депортация марказларида бўлганлар ҳам бор.
Вазирлар Маҳкамаси ҳузуридаги Миграция агентлиги маълумотига кўра, 30 июль – 30 август кунлари ўтказилган “Ватанга қайтариш” акцияси доирасида 1300 нафар фуқаро дунёнинг 15 давлатидан Ўзбекистонга қайтарилди. Акция хорижда қийин вазиятга тушиб қолган юртдошларимизни қўллаб-қувватлаш мақсадида ташкил этилди.
Бир ой давомида агентликнинг колл-маркази ва дипломатик ваколатхоналарга 3400 дан ортиқ мурожаат келиб тушган. Шунингдек, 2100 нафардан зиёд фуқарога ҳуқуқий ёрдам кўрсатилди.
Қайтарилганлар орасида 654 нафар аёл ва 438 нафар бола, шунингдек, депортация марказларида сақланиб турган 163 нафар ҳамюртимиз ҳам бор.
Ҳозирда тегишли идоралар қайтарилган фуқароларнинг жамиятга мослашуви бўйича зарур чораларни амалга оширмоқда. Мутасадди ташкилотлар уларни ижтимоий ҳаётга интеграция қилиш ва ҳуқуқий кўмак кўрсатишда давом этмоқда.
