Бир нечта вилоятларда прокурор, судья ёрдамчиси ва адвокатларнинг коррупцион ҳаракатлари фош этилди

Давлат хавфсизлик хизмати, прокуратура органлари ҳамда иқтисодий жиноятларга қарши курашиш департаменти томонидан олиб борилган тезкор тадбирлар давомида Сурхондарё, Андижон ва Жиззах вилоятларида мансабдор ва ҳуқуқшунос шахсларнинг қонунга хилоф ҳаракатлари фош этилди.

 

Сурхондарё вилояти прокуратурасининг бўлим прокурори хизмат мавқеидан фойдаланиб, Денов тумани ички ишлар бўлими ҳузуридаги тергов бўлими юритувига келиб тушган, 1999 йилда туғилган фуқаро билан боғлиқ терговга қадар текширув материалларида жиноят аломатлари мавжуд бўлишига қарамай, жиноят иши қўзғатмаслик тўғрисида кўрсатма беришини айтиб, эвазига 2000 АҚШ доллари талаб қилган.

 

Жорий йилнинг 5 сентябр куни у сўралган пул маблағидан 5 миллион сўмни ўз номидаги пластик карта орқали ўтказиб олган. Давлат хавфсизлик хизмати ходимлари томонидан Термиз шаҳрида ўтказилган тезкор тадбирда прокурор талаб қилинган пулдан 1300 АҚШ долларини олаётган вақтида ашёвий далиллар билан ушланди.

 

Мазкур ҳолат юзасидан унга нисбатан Ўзбекистон Республикаси Жиноят кодексининг 168-моддаси 3-қисми “в” банди бўйича жиноят иши қўзғатилиб, қамоқ эҳтиёт чораси қўлланилди.

 

Андижон вилояти суди фуқаролик ишлари бўйича судлов ҳайъати судьясининг катта ёрдамчиси Андижон шаҳрида яшовчи, 1992 йилда туғилган аёл номидан Андижон туманлараро фуқаролик ишлари бўйича судига даъво аризасини киритиб, юқори лавозимда ишловчи танишлари орқали мазкур аёлнинг собиқ турмуш ўртоғига тегишли мол-мулкларнинг бир қисмини унинг фойдасига ҳал қилиб бериш эвазига 500 АҚШ доллари талаб қилган.

 

Судья ёрдамчиси дастлаб талаб қилинган маблағдан 200 АҚШ долларини олган. Давлат хавфсизлик хизмати ва иқтисодий жиноятларга қарши курашиш департаменти ходимлари ҳамкорлигида Андижон шаҳрида ўтказилган тезкор тадбирда у қолган 300 АҚШ долларига тенг бўлган 3 миллион 800 минг сўмни олаётганида ашёвий далиллар билан қўлга олинди.

 

Мазкур шахсга нисбатан Ўзбекистон Республикаси Жиноят кодексининг 168-моддаси 3-қисми “в” банди ва 28,211-моддаси 1-қисми билан жиноят иши қўзғатилиб, қамоқ эҳтиёт чораси қўлланилди.

 

Жиззах шаҳрида эса маҳаллий адвокатлик ҳайъати адвокати ўзининг хизмат мавқеидан фойдаланиб, Мирзачўл туманида яшовчи, 1981 йилда туғилган фуқаро билан тил бириктирган. Улар Сирдарё вилоятининг Гулистон туманида жойлашган манзил колонияда жазони ўтаётган маҳкумни Жиззах вилояти суд тизимидаги танишлари орқали оқлов ҳукми чиқариш асосида муддатидан олдин озодликка чиқариб бериш эвазига 6000 АҚШ доллари талаб қилган.

 

Давлат хавфсизлик хизмати ва прокуратура органлари ходимлари томонидан Жиззах шаҳрида ўтказилган тезкор тадбирда адвокат ва унинг шериги сўралган пул маблағини олаётган вақтида ашёвий далиллар билан қўлга олинди.

 

Ушбу шахсларга нисбатан Ўзбекистон Республикаси Жиноят кодексининг 25,168-моддаси 3-қисми “в” банди ҳамда 28,211-моддаси 1-қисми бўйича жиноят иши қўзғатилди ва тергов ҳаракатлари олиб борилмоқда.