Қашқадарёда болани уриб кетмоқчи бўлган Дамас ҳайдовчиси ушланди
68 ёшли “Damas” ҳайдовчиси аниқланиб, унга нисбатан маъмурий иш қўзғатилган.
11 сентябрь куни Шаҳрисабз шаҳрида пиёдалар йўлакчасидан ўтаётган ўқувчига йўл бермаган “Damas” ҳайдовчиси йўл ҳаракати хавфсизлиги қоидаларини қўпол равишда бузди. Ҳодиса тасвирланган видеолавҳа ижтимоий тармоқларда кенг муҳокамага сабаб бўлди.
Видеода бола йўлдан ўтаётганда бошқа машиналар тўхтагани, бироқ “Damas” ҳайдовчиси ҳаракатни давом этиргани кўринади. Ўқувчи машинани кўриб югуришга уриниб йиқилиб тушган, автомобиль эса катта тезликда унинг ёнидан ўтиб кетган. Яхшиямки, бола жиддий жароҳат олмаган.
ЙҲХХ ахборот хизмати маълум қилишича, 68 ёшли ҳайдовчи аниқланиб, унга нисбатан маъмурий иш қўзғатилган.
Шаҳрисабз шаҳри суди қоидабузарга БҲМнинг 25 баравари миқдорида (10,3 млн сўм) жарима белгилади ва уни бир йил муддатга транспорт бошқариш ҳуқуқидан маҳрум қилди. Мутасаддилар ҳодиса йўлларда пиёдалар, айниқса, болалар хавфсизлигини таъминлаш масаласи янада долзарб эканини таъкидлашмоқда.
