Хоразмдаги 5 кишининг ўлимига сабаб бўлган авария бўйича ЙПХ ходимлари қамалди
Улар биринчи ёрдам кўрсатиш ўрнига воқеа жойидан кетиб қолган.
Хоразм вилоятида беш кишининг ҳалок бўлишига сабаб бўлган йўл-транспорт ҳодисаси иши бўйича суд ҳукми эълон қилинди.
Суд ҳужжатларига кўра, 2024 йил 27 сентябрь куни 19 ёшли Ш.Ш. Собалт машинасида Боғот–Янгиариқ–Хива йўлида қарама-қарши йўналишга чиқиб, телефонидан фойдаланган. ЙПХ ходимларининг тўхташ ишорасига бўйсунмаган ҳайдовчи катта тезликда қочиб, VAZ-2106 билан тўқнашган.
Фожиа оқибатида битта оиланинг беш аъзоси – 1954 йилда туғилган эркак, 1957 йилда туғилган аёл, 2004 йилда туғилган ҳомиладор аёл, 2014 йилда туғилган қиз ва 2020 йилда туғилган бола ҳалок бўлди. Яна бир бола оғир тан жароҳати олди.
Ҳодиса жойида хизмат олиб борган ЙПХ ходимлари Р.M. ва Д.M. биринчи ёрдам кўрсатиш ўрнига воқеа жойидан кетиб қолган.
Суд ҳукмига кўра, ҳайдовчи 7 йил муддатга озодликдан маҳрум қилинди ҳамда 3 йил ҳайдовчилик ҳуқуқидан чекланган. Икки ЙПХ ходими эса хизмат вазифасини бажармаслик ва ваколатларини суиистеъмол қилишда айбли деб топилиб, 3 йил муддатга озодликдан маҳрум этилди.
Вилоят судининг апелляция ва тафтиш инстанциялари дастлабки ҳукмни ўзгаришсиз қолдирди.
