Наманганда поезд Gentra’ни уриб юборди, 6 киши ҳалок бўлди
Автомобиль ҳайдовчиси қоидаларни бузган ва поезд яқинлашаётганига қарамай темирйўлни кесиб ўтишга уринган.
13 сентябрь куни Наманган вилоятининг Чортоқ туманида оғир йўл-транспорт ҳодисаси содир бўлди. Бу ҳақда “Ўзбекистон темир йўллари” АЖ матбуот хизмати хабар берди.
Маълум қилинишича, Чортоқ–Уйчи бекатлари оралиғидаги қўриқланмаган темирйўл кесишмасига Gentra русумли енгил автомобиль поезд билан тўқнашган. Дастлабки тергов материалларига кўра, автомобиль ҳайдовчиси йўл ҳаракати қоидаларини бузиб, поезд яқинлашиб келаётганига қарамай темирйўлни кесиб ўтишга уринган.
Автомобиль ичида жами олти киши бўлган — беш нафар аёл ва бир нафар вояга етмаган бола. Кучли зарба оқибатида барча йўловчилар воқеа жойида ҳалок бўлган.
Поезд машинистлари тўсатдан вазиятни кўриб, шошилинч тормоз қўллашган. Бироқ катта тезлик сабабли ҳодисанинг олдини олиш имкони бўлмаган. Поездга енгил техник зарар етган.
