Экология вазирлиги 20 та корхона фаолиятини вақтинча тўхтатди

Жорий йилнинг дастлабки 8 ойи давомида Тошкент шаҳри атмосфера ҳавосини яхшилаш мақсадида бир қатор ижобий ўзгаришлар амалга оширилди, дея хабар бермоқда Экология вазирлиги матбуот хизмати.

 

Қайд этилишича, 2025 йилнинг январь — август ойларида 1452 объект хатлов қилинди, 174 та тунги рейд тадбири ўтказилиб, 281 та қонун бузилиш ҳолати аниқланган. 154 нафар шахсга нисбатан маъмурий баённома расмийлаштирилиб, 20 та объект фаолиятини вақтинча тўхтатиш ҳақида судга ариза киритилган, 179 та қонун бузилиш ҳолати бартараф этилган. Шунингдек, 11 та замонавий қозон, 19 та фильтр ва 12 та чанг тозалаш ускуналари ўрнатилган.

 

2025 йилда йирик қурилиш материаллари ишлаб чиқарувчи ва бошқа 1–2-тоифага мансуб 60 та корхона томонидан 200 минг туп дарахт ва бута кўчатлари экилиши режалаштирилган.

 

Ҳар йили икки босқичда ўтказиладиган “Тоза ҳаво” ойлигининг биринчи босқичида (10 апрель – 10 май) Тошкентда 40 050 та автотранспорт воситаси текширилган. Уларнинг 586 тасида атмосфера ҳавосига ташланаётган зарарли газлар миқдори меъёрдан ортиқлиги аниқланиб, белгиланган тартибда камчиликлар бартараф этилган. Кўрилган чора-тадбирлар натижасида атмосферага 4,7 минг тонна зарарли ташламалар чиқарилишининг олди олинган.