Норин дарёсида “биринчи миллий ГЭС” ишга туширилди
Шавкат Мирзиёев ташрифи доирасида Норин дарёсида барпо этилган ГЭС-1 фойдаланишга топширилди.
Мазкур иншоот мамлакатимизда тўлиқ маҳаллий маҳсулот ва ускуналар асосида қурилган илк гидроэлектр станцияси ҳисобланади.
Ўзбекистон иқтисодий барқарорлигини таъминлашда қайта тикланувчи энергия манбаларини ривожлантириш стратегик йўналиш сифатида белгиланган. Охирги йилларда Бухоро, Жиззах, Қашқадарё, Навоий, Самарқанд ва Сурхондарёда 10 дан ортиқ қуёш ва шамол электр станциялари, қатор ҳудудларда эса 450 мегаватт қувватга эга ГЭСлар ишга туширилган эди.
“Ўзбекгидроэнерго” АЖ томонидан Норин дарёсида умумий қиймати 428 миллион доллардан ортиқ, 228 мегаватт қувватга эга 6 та ГЭС каскади қурилиши бошланган. Биринчи босқичда ишга туширилган ГЭС-1 йилига 171 миллион киловатт-соат электр энергияси ишлаб чиқариш имкониятига эга бўлиб, 130 та янги иш ўрни яратади.
ГЭС фаолияти туфайли 430 мингта хонадон барқарор электр энергияси билан таъминланади, йилига 290 миллион куб метр газ иқтисод қилинади. Бу эса иқтисодиёт учун қарийб 300 миллиард сўмлик қўшимча самара демакдир.
Лойиҳа доирасида илк бор мамлакат гидроэнергетикаси тарихида юқори самарадорликка эга горизонтал капсула шаклидаги гидроагрегатлар ўрнатилди. Шунингдек, сув тўғон иншооти, диспетчерлик пункти ва хизмат бинолари қурилди, ҳудудда 6 минг туп манзарали дарахт экилиб, келгуси баҳорда яна 7 минг туп мевали кўчат ўтқазилиши режалаштирилган.
Норин ГЭСлар каскади нафақат энергетика соҳаси, балки экология, иқтисодиёт ва экотуризм ривожига ҳам хизмат қиладиган стратегик лойиҳа ҳисобланади. 2026 йилда иккинчи ва учинчи, 2027 йилда эса қолган станциялар ишга туширилиши кўзда тутилган.
