Ўзбекистон Яқин Шарқдаги ҳарбий тажовузни қоралади
Шавкат Мирзиёев саммитга мурожаат йўллаб, давлатларни тинчлик ва бирдамликка чақирди.
Доҳа шаҳрида ўтаётган фавқулодда Араб-ислом саммитида Ўзбекистон ташқи ишлар вазири Бахтиёр Саидов Президент Шавкат Мирзиёевнинг иштирокчиларга йўллаган мурожаатини етказди.
Мурожаатда Ўзбекистон Яқин Шарқда тинчлик ва хавфсизликка таҳдид солаётган сўнгги ҳарбий тажовузни кескин қоралаб, Қатардаги халқ ва барча мусулмон мамлакатлари билан мустаҳкам бирдамликда эканини таъкидлади.
Шунингдек, Ўзбекистон барча можароларни тинч йўл ва дипломатия орқали ҳал қилиш зарурлигини, халқаро ҳамжамият зудлик билан зўравонликни тўхтатиши лозимлигини билдирди. Президентнинг таъкидлашича, БМТ резолюцияларига мувофиқ фаластинликларнинг мустақил давлат барпо этиш ҳуқуқи ҳурмат қилиниши шарт.
Расмий Тошкент зарурат туғилганда жабрланганларга инсонпарварлик ёрдами кўрсатишга тайёрлигини ҳам билдирди. Бу борада Ўзбекистон илгари ҳам фаластинлик фуқаролар гуруҳини қабул қилиб, қўллаб-қувватлаган эди. Саммит эса минтақада барқарорликни таъминлаш учун бирдамлик ва қўшма қарорлар ишлаб чиқишда муҳим майдон бўлиб хизмат қилмоқда.
