Сурхондарёда кадастр ходими ва фуқаро ноқонуний ер савдосида ушланди
Улар ер учун 200 млн, ҳужжатлар учун 4 млн сўм талаб қилган.
Сурхондарё вилоятида давлат ер участкаcини ноқонуний сотишга уриниш фош этилди.
Бош прокуратура матбуот хизмати маълум қилишича, Жарқўрғон туманида Кадастр палатаси ходими ҳамда маҳаллий фуқаро давлат захирасидан 40 сотих ер майдонини ноқонуний равишда сотишга уринаётган пайтда қўлга олинган.
Тергов материалларига кўра, улар ер участкаси учун 200 миллион сўм ва ҳужжатларни тайёрлаш учун қўшимча 4 миллион сўм талаб қилган. Пул маблағи топширилаётган вақтда ҳуқуқни муҳофаза қилувчи органлар ходимлари томонидан жиноят ҳаракати тўхтатилган.
Мазкур ҳолат юзасидан Жиноят кодексининг тегишли моддалари бўйича жиноят иши қўзғатилган. Ҳозирда тергов ҳаракатлари олиб борилмоқда.
