Хориждан келган таклифни рад этиб, қишлоқда дарс бераётган бухоролик ўқитувчига автомобиль совға қилинди
Буюк Британияда таҳсил олиб, юртга қайтиб четка ҳудуд мактабида ёшларга таълим бераётган Биллура Икромова эзгу ташаббуслари учун Президент томонидан эътироф этилди.
Президент Шавкат Мирзиёев Ўқитувчи ва мураббийлар куни арафасида соҳа вакиллари билан ўтказилган мулоқотда ўз касбига фидокорона ёндашётаган бир қатор ўқитувчи ва мураббийларнинг фаолиятини алоҳида эътироф этди.
Шу муносабат билан, Бухоро вилояти Ромитан туманидаги 38-мактабда инглиз тили фанидан дарс бераётган ёш педагог Биллура Икромова ҳам давлат раҳбарининг эътирофига сазовор бўлди.
Президент ўз нутқида шундай деди:
“Бугунги тадбиримизда ўзи ёш бўлишига қарамасдан, юзлаб ўғил-қизларимизни юқори марраларга етаклаётган когонлик қизимиз Биллура Икромова ҳам қатнашяпти. Биллура қизимиз топ-200 таликка кирадиган Буюк Британиянинг Рединг олийгоҳини битириб, катта-катта идоралардан бўлган таклифларни рад этиб, Ромитаннинг энг четка қишлоғидаги мактабда инглиз тилидан дарс бермоқда”.
Биллура Икромова TESOL, ESOL ва IELTS (C1) каби нуфузли халқаро сертификатларга эга бўлиб, қишлоқ қизлари учун менторлик лойиҳасини амалга ошириб келмоқда. Унинг ташаббуси билан бир қатор йирик грант лойиҳалари тайёрланди ва натижада юзлаб ёшлар хорижий олийгоҳларда таълим олиш, шунингдек, халқаро ижтимоий дастурларда иштирок этиш имкониятига эга бўлди.
Устознинг фидокорона меҳнати ва ташаббуслари эътирофи сифатида унга Президент совғаси – BYD CHAZOR автомобили тантанали тарзда топширилди.
Биллура Икромова ўз миннатдорлигини изҳор этар экан, шундай деди:
“Мамлакатимизда ўқитувчилар учун яратилаётган имкониятлар туфайли менинг юксак орзуларим рўёбга чиқди. Бугун бор салоҳиятим ва куч-ғайратимни Она Ватаним равнақи ва тараққиётига сафарбар этишга бел боғлаганман”.
