1 ноябрдан электрон порталдан олинган маълумотлар қоғоз ҳужжатга тенглаштирилади
Маҳаллаларда аҳолига оид маълумотларни юритиш “Рақамли маҳалла” платформаси орқали амалга оширилади.
Ўзбекистонда электрон давлат хизматларини янада такомиллаштириш ва аҳолининг улардан фойдаланиш имкониятини кенгайтириш бўйича янги чора-тадбирлар белгиланди. 2025 йил 16 сентябрда қабул қилинган Президент қарорига кўра, “Рақамли ҳукумат” дастури доирасида 41 та устувор лойиҳа амалга оширилади ҳамда электрон хизматлар улуши 70 фоизга етказилади.
Қарорга мувофиқ, 2025 йил 1 ноябрдан мобил алоқа операторлари, тижорат банклари ва тўлов ташкилотлари мобил иловалар орқали Ягона порталда пулли давлат хизматларини тақдим этади. 1 декабрдан эса нодавлат нотижорат ташкилотларига идоралараро рақамли ҳамкорлик қилиш ҳуқуқи берилади.
2026 йилдан бошлаб фуқароларнинг ижтимоий ёрдам олиш учун мурожаатлари, маҳаллаларда аҳолига оид маълумотларни юритиш ва улар билан ишлаш жараёнлари “Рақамли маҳалла” платформаси орқали амалга оширилади. Шунингдек, ногиронликни белгилаш, талабалар учун уй-ижара тўловини қисман қайтариш ҳамда таълим хизматларини кўрсатиш жараёнлари ҳам электрон тизимга ўтказилади.
