Тошкент метрополитенида янги инфокиоскалар ишга туширилди
Йўловчилар эндиликда инфокиоска орқали нақд пул эвазига чипта харид қилишлари мумкин.
Тошкент метрополитенида йўловчилар учун қулайликларни ошириш мақсадида замонавий инфокиоскалар жорий этилмоқда. Ҳозирги кунда 24 та қурилма ишга туширилган бўлиб, улар орқали нақд пул эвазига қоғоз чипта харид қилиш мумкин. Мазкур тизим нақд маблағни ўзгартириб бермайди — тўловлар йўловчининг мобил телефон ҳисобига ўтказилади.
Лойиҳа босқичма-босқич кенгайтирилади ва йил якунига қадар инфокиоска сони 200 тага етказилиб, барча бекатларда ўрнатилиши режалаштирилган. Келгусида улар орқали уй-жой коммунал хизматлари, мобил алоқа тўловлари, карталардан маблағ ечиш ва бошқа интерактив хизматлар ҳам йўлга қўйилади.
Мазкур ташаббус ATTO ва Тошкент метрополитени ҳамкорлигида, етакчи финтех компаниялардан бири Alif томонидан амалга оширилмоқда.
Маълумот учун, Тошкент метросида жами 50 та бекат мавжуд бўлиб, инфокиоскалар ҳар бир кириш қисмида ўрнатилади.
Аввалроқ метрополитен кассалари қисқартирилиши ортидан ишдан бўшаган ходимлар янги касбларга қайта тайёрланиши ҳақида хабар берилганди.
