Женевада БМТ биносида “Ўзбекистон хонаси” очилади
“Бу маскан маданиятимизнинг мўъжазгина бир бўлаги сифатида кўп миллатли ҳамжамиятга намойиш этилади” — Саида Мирзиёева
Женевада бўлиб ўтган Ўзбекистон мустақиллигининг 34 йиллигига бағишланган қабул маросимида Президент администрацияси раҳбари Саида Мирзиёева мамлакат учун муҳим янгиликни эълон қилди. Унинг айтишича, тез орада БМТнинг Европадаги марказий қароргоҳида — Палаис дес Натионс биносида “Ўзбекистон хонаси” очилади.
“Бу маскан маданиятимизнинг мўъжазгина бир бўлаги сифатида кўп миллатли ҳамжамиятга намойиш этилади. У ҳар қандай қийинчилик ва зиддиятларга қарамай, бизнинг дунёга очиқлигимиз рамзига айланади”, — деди Мирзиёева нутқида.
Қабул маросимида Саида Мирзиёева Ўзбекистоннинг келажаги, барқарор тараққиёт, маданият ва инсоният учун умумий бўлган қадриятлар ҳақида ҳам сўз юритди. У БМТ биносидаги янги хонанинг мамлакатнинг халқаро майдондаги ислоҳот ва ҳамкорлик сиёсатини мустаҳкамлашини таъкидлади.
Маълумот учун, Женевадаги Палаис дес Натионс — БМТнинг Европадаги марказий қароргоҳи бўлиб, унда 2 800 дан ортиқ хоналар ва 34 та йирик конференция заллари мавжуд. Иншоот халқаро музокаралар ва дипломатик учрашувларнинг энг муҳим марказларидан бири ҳисобланади.
