Саида Мирзиёева ЖСТ раҳбари билан учрашди
Женевада Ўзбекистоннинг ЖСТга қўшилиш жараёни муҳокама қилинди.
17 сентябрь куни Ўзбекистон Президенти Администрацияси раҳбари Саида Мирзиёева Женевада Жаҳон савдо ташкилоти (ЖСТ) Бош директори Нгози Оконжо-Ивеала билан учрашди. Бу ҳақда Мирзиёева ўзининг ижтимоий тармоқдаги саҳифасида хабар берди.
“Мулоқот давомида юртимизда амалга оширилаётган туб ислоҳотлар, ЖСТга аъзо бўлиш йўлидаги янги эҳтимолий қийинчиликлар ҳамда ишонч ва ҳамкорликнинг муҳим аҳамияти ҳақида очиқ фикр алмашдик”, — дея ёзди Саида Мирзиёева.
У шунингдек, Нгози хонимга етакчилик ва доимий қўллаб-қувватлови учун миннатдорлик билдирганини таъкидлади. Мирзиёева қайд этишича, жаҳон савдосининг муҳим даврида Ўзбекистон ислоҳотлар доирасида ўз мажбуриятларини қатъият билан бажаришда давом этади.
Эслатиб ўтамиз, бу Саида Мирзиёеванинг ЖСТ раҳбари билан илк учрашуви эмас. Ўтган йили у Тошкентдаги халқаро конференция ва Женевадаги мулоқотлар чоғида ҳам Нгози Оконжо-Ивеала билан юзма-юз учрашган эди. Шу билан бирга, 2025 йил давомида Ўзбекистон ЖСТга қўшилиш бўйича бир қатор икки томонлама музокараларни — жумладан, АҚШ, Буюк Британия, Швейтсария ва бошқа давлатлар билан — муваффақиятли якунлади.
