Тошкентда битта уй учун 200 минг долларгача харажат керакми?
Қурилиш вазирлиги ижтимоий тармоқда тарқалган хабарга изоҳ берди.
29 август куни қурилиш соҳаси тадбиркорлари билан ўтказилган очиқ мулоқотда ўзини бир нечта қурилиш компаниялари раҳбари сифатида таништирган Усмонжон Абдусамадов турли даъволар билан чиққанди. У, жумладан, “Тошкентда битта уй учун 200 минг долларгача харажат бор”, - дея фикр билдирганди.
Қурилиш вазирлигига кўра, мазкур маълумотлар ижтимоий тармоқларда турли муҳокамаларни келтириб чиқарган. Натижада қурилиш соҳасида республика миқёсида олиб борилаётган ислоҳотларга, соҳа вакиллари ҳамда Қурилиш ва уй-жой коммунал хўжалиги вазирлигига нисбатан салбий муносабат шаклланмоқда. Бу эса ўз навбатида Вазирлик ва унинг тизимида фаолият юритаётган ходимларнинг шаъни, қадр-қиммати ва ишчанлик обрўсига путур етказмоқда.
“Шу боис Қурилиш ва уй-жой коммунал хўжалиги вазирлиги фуқаро (тадбиркор) Усмонжон Абдусамадовга нисбатан тегишли тартибда жавобгарлик чоралари қўлланишини сўраб, Ички ишлар вазирлигига расмий ариза киритганини маълум қилади.
Қурилиш соҳасига оид барча давлат хизматлари ва тўловлар белгиланган тартибда электрон тарзда амалга оширилади. Бу жараёнда қўшимча маблағ талаб қилиниши қатъий тақиқланган”, дейилади расмий муносабатда.
