Тошкентда BYD ва Gentra ҳайдовчилари жанжалидан сўнг Gentra ҳайдовчисининг рафиқаси ҳомиласидан айрилди
Ҳодиса бўйича жиноят иши қўзғатилиб, можаро иштирокчилари қўлга олинди.
Пойтахтда содир бўлган йўл-транспорт ҳодисаси жиддий оқибатларга олиб келди. 19 март куни Яккасарой тумани Мукимий кўчасида “Lacetti” ва “BYD” автомашиналари ҳайдовчилари ўртасида келиб чиққан можарода ҳомиладор аёл тан жароҳати олиб, ўз фарзандидан айрилди.
Дастлабки маълумотларга кўра, воқеа ҳайдовчилардан бири йўлнинг ўнг бўлагига ўтишга уриниб қолганида бошланган. Можаро давомида “BYD” ҳайдовчиси ва унинг яқин қариндоши иккинчи ҳайдовчига ҳужум қилиб, автомобиль ойналарини синдирган ҳамда унинг ҳомиладор турмуш ўртоғига жисмоний тажовуз қилган.
Тошкент шаҳар Ички ишлар бош бошқармаси мазкур ҳолат юзасидан Ўзбекистон Республикаси Жиноят кодексининг “Безорилик” моддаси бўйича жиноят иши қўзғатилганини маълум қилди. Ҳодисанинг барча иштирокчилари қўлга олинган.
Ҳомила нобуд бўлишининг аниқ сабабларини аниқлаш учун суд-тиббий экспертиза тайинланган. Мутаҳассислар хулосаси чиққанидан сўнг, жиноят ишининг ҳуқуқий малакаси қайта кўриб чиқилиши мумкин.
