Инсон органлари савдоси билан шуғулланган уюшган гуруҳ қўлга олинди
Уюшган жиноий гуруҳнинг 2023-2025 йиллардаги фаолияти давомида 32 нафар беморга буйрак ёки жигар тўқималари кўчириб ўтказилган.
Давлат хавфсизлик хизмати ва Ички ишлар вазирлиги томонидан ўтказилган тезкор-қидирув тадбирлари натижасида инсон органлари ва тўқималари савдоси билан шуғулланган уюшган жиноий гуруҳ фаолияти фош этилди.
Аниқланишича, Тошкент шаҳри ҳамда Тошкент, Фарғона, Бухоро ва Қашқадарё вилоятларида яшовчи 12 нафар шахсдан иборат гуруҳ 2023–2025 йиллар давомида ноқонуний фаолият юритган. Улар ижтимоий тармоқлар орқали буйрак ва жигар касалликларидан азият чекаётган беморларни топиб, соғлом фуқароларни катта миқдордаги пул эвазига органларини сотишга ундаган.
Қилмишларини амалга ошириш мақсадида ҳужжатлар қалбакилаштирилган, донор ва беморлар қариндош сифатида кўрсатилган ва қўшни давлатдаги хусусий клиникаларда жарроҳлик амалиётлари ўтказилган. Шу йўл билан 32 нафар беморга орган ёки тўқима кўчириб ўтказилган.
Беморлар томонидан тўланган катта миқдордаги маблағнинг бир қисми клиника харажатлари ва донорлар мукофотига сарфланган, қолган қисми эса жиноятчилар ўртасида тақсимланган. Шунингдек, соғлиғида ижобий ўзгариш бўлмаган беморларга оғриқни камайтирувчи кучли таъсир қилувчи дори воситалари қиммат нархларда сотилган.
Ҳолат юзасидан жиноят иши қўзғатилиб, айбланувчиларга нисбатан Ўзбекистон Республикаси Жиноят кодексининг 133-1, 228, 246 ва 273-моддалари бўйича иш қўзғатилди. Ҳозирда тергов якунланиб, жиноят иши суд органларига юборилган.
