Туркия ва Ўзбекистон томонидан ўтказилган тезкор тадбирда “Соня” қўлга олинди
Бош консулхона ушбу фуқародан жабр кўрганлардан мурожаат қилишларини сўрамоқда.
Ўзбекистон Республикаси Ички ишлар вазирлиги ҳамда Туркия Республикаси Ички ишлар вазирлиги ҳамкорлигида ўтказилган тезкор тадбирлар натижасида, одам савдоси жиноятини содир этганликда айбланиб қидирувда бўлган Раҳматова Санобар (1974 йилда туғилган, “Соня” лақаби билан танилган) мамлакатимизга депортация қилинди.
Аниқланишича, у 2013–2015 йилларда Таиланднинг Бангкок шаҳрида фоҳишахона ташкил этиб, ватандош аёлларни юқори даромадли иш ваъдaси билан алдаб, Қозоғистон орқали Таиландга олиб борган ҳамда фоҳишалик қилишга мажбурлаган жиноий гуруҳ таркибида фаол иштирок этган.
Мазкур шахснинг ноқонуний фаолиятидан жабрланган фуқаролар Ўзбекистон Республикаси Ички ишлар вазирлигига ёки унинг ҳудудий бўлинмаларига, шунингдек, Истанбул шаҳридаги Бош консулхонага мурожаат қилишлари мумкин.
Шунингдек, сўнгги пайтларда фирибгарлик ҳолатларига оид мурожаатлар кўпайгани боис, фуқароларга ҳушёр бўлиш, бегона шахслардан келадиган шубҳали таклифларга ишонмаслик ва фирибгарларга алданиб қолмаслик тавсия этилмоқда.
