2025/2026-ўқув йили учун тўлов-контракт миқдорлари тасдиқланди

Олий таълим, фан ва инновациялар вазирлиги матбуот хизмати 2025/2026-ўқув йили учун давлат олий таълим муассасаларида тўлов-контракт миқдорлари тасдиқланганини маълум қилди. Бу бўйича Давлат қабул комиссияси мажлисида тегишли баён қабул қилинган.

 

Янги тартибга кўра, бакалавриат таълим йўналишлари ва магистратура мутахассисликлари бўйича бир нафар талабани бир йил ўқитиш учун базавий тўлов-контракт қиймати белгиланди. Стипендияли контракт миқдори эса амалдаги стипендия суммасини 12 ойга кўпайтирган ҳолда ҳисобланади. Агар ўқув йили давомида стипендия миқдори оширилса, талабанинг умумий тўлови ҳам қайта ҳисобланади.

 

 

 

 

Молиявий мустақилликка эга олий таълим муассасалари қабул қилинган талабалар учун контракт миқдорини мустақил белгилаш ҳуқуқига эга. Талабаликка тавсия этилган абитуриентлар учун белгиланган тўловнинг камида 25 фоизини 2025 йил 30 октябргача тўлаш муддати узайтирилди.

 

Шунингдек, иқтисодиёт тармоқларида камида 5 йил иш стажига эга бўлган ва тавсиянома асосида ўқишга қабул қилинганлар учун контракт миқдори базавий тўлов-контракт қийматидан икки баробар қилиб белгиланди. Жорий йилда табақалаштирилган контракт миқдори олий таълим муассасалари раҳбарлари томонидан мустақил белгиланади.