Тошкент вилоятида фуқаро ноқонуний лочин сақлагани учун 620 млн сўм товон тўлайди
Рейд давомида аниқланган ноёб қушлар вақтинча Тошкент ҳайвонот боғига ўтказилди.
Тошкент вилоятининг Чиноз туманида истиқомат қилувчи фуқаро қонунга хилоф равишда нойоб йиртқич қушларни сақлагани учун жавобгарликка тортилди. Экология, атроф-муҳитни муҳофаза қилиш ва иқлим ўзгариши вазирлиги хабарига кўра, рейд тадбирлари чоғида фуқаронинг уйидан “Қизил китоб”га киритилган қўпол лочин ва хобби лочин аниқланган.
Мазкур ҳуқуқбузарлик натижасида ҳайвонот дунёсига 620 миллион сўмдан ортиқ зарар етказилгани ҳисоблаб чиқилди. Қушлар олиб қўйилиб, вақтинча Тошкент ҳайвонот боғига топширилди.
Ҳолат юзасидан тегишли ҳужжатлар расмийлаштирилиб, қонунчиликка мувофиқ чора кўриш учун материаллар Бош прокуратурага тақдим этилган. Мутасадди органлар таъкидлашича, ҳайвонот дунёсига асраб-авайлаш ва ноқонуний сақлашнинг олдини олиш бўйича профилактик рейдлар давом этмоқда.
