Самарқандда чақалоқни ўғирлаб сотган ҳамшира 5 йилга қамалди
Ҳамшира чақалоқни 5 млн сўм ва 100 доллар эвазига сотган.
Самарқанд вилояти Паяриқ туманида тиббиёт ходимаси томонидан чақалоқни ноқонуний равишда олиб чиқиб кетиш ва уни сотишга уриниш ҳолати юзасидан суд ҳукми чиқарилди.
Суд ҳужжатларига кўра, туман марказий шифохонаси туғруқхона бўлимида ишлаган К.А. исмли ҳамшира 2025 йил 12 апрель куни руҳий носоғлом аёлнинг янги туғилган қизини алдов йўли билан олиб чиққан. Кейинчалик чақалоқни фуқаро Ф.Б.га 5 миллион сўм ва 100 АҚШ долларига берган. Олинган маблағ шахсий эҳтиёжларига сарфланган.
Суд қарорига биноан, К.А. Ўзбекистон Республикаси ЖКнинг 135-моддаси 3-қисми “а” бандига мувофиқ жиноят содир этганликда айбли деб топилиб, 5 йил муддатга озодликдан маҳрум қилинди. Шунингдек, унга 2 йил давомида соғлиқни сақлаш тизимида раҳбарлик ва моддий жавобгарлик лавозимларида ишлаш ҳуқуқи тақиқланади.
Апелляция инстанцияси дастлабки ҳукмнинг фақат автомобилни давлат фойдасига мусодара қилиш қисми бўйича қарорни ўзгартириб, машинани эгасида қолдирди.
