Шавкат Мирзиёев ўқитувчи ва мураббийларни касб байрами билан табриклади
Ўқитувчиларга ипотека бўйича енгилликлар, имтиёзли кредитлар ва бошқа ижтимоий имкониятлар яратилиши маълум қилинди.
Ўзбекистон Республикаси Президенти Шавкат Мирзиёев мамлакатимиздаги барча устоз ва мураббийларни 1 октябрь – Ўқитувчи ва мураббийлар куни билан табриклади.
Давлат раҳбари ўз табригида ёш авлод тарбияси ва таълимини юксак даражада ташкил этишда ўқитувчиларнинг хизматларини алоҳида эътироф этиб, уларнинг меҳнатини жамият тараққиёти ва келажак пойдевори сифатида баҳолади.
Табрикда сўнгги йилларда таълим ва илм-фан соҳасида амалга оширилган кенг кўламли ислоҳотлар, янги мактаблар, боғчалар, олий таълим муассасалари барпо этилгани, педагогларнинг меҳнатини муносиб қадрлаш чоралари кўрилаётгани таъкидланди.
Шунингдек, таълим тизимида бошланган янги дастурлар, жумладан, “Янги авлод” боғчалари, 12 йиллик мактаб таълими, ягона давлат имтиҳонлари, касбий таълимда халқаро стандартларнинг жорий этилиши ҳақида сўз борди.
Президент, шунингдек, педагогларнинг ижтимоий қўллаб-қувватланиши масаласига алоҳида тўхталиб, уларнинг ипотека шартларида енгилликлар, ўқитувчи фарзандлари учун контракт тўловида чегирмалар, имтиёзли кредитлар ва бошқа қўллаб-қувватлов чоралари жорий этилишини маълум қилди.
Давлат раҳбари устоз ва мураббийларга мустаҳкам соғлиқ, оилавий фаровонлик ва келгуси фаолиятларида улкан муваффақиятлар тилади.
