Ўрмон хўжаликларига 1,3 млн долларлик янги техникалар тарқатилди

“Ўзбекистонда барқарор ўрмон ландшафтларини тиклаш” лойиҳасини амалга ошириш чора-тадбирлари тўғрисида”ги Президент қарорига мувофиқ, мамлакатимизда янги ўрмонларни барпо этиш ва мавжудларини қайта тиклаш ишларини самарали ташкил этиш мақсадида Жаҳон банки маблағлари ҳисобидан Беларусда ишлаб чиқарилган 39 та қишлоқ хўжалиги техникаси олиб келинди.

 

Бугун Тошкент шаҳрида Экология вазирлиги ҳузуридаги Ўрмон агентлиги томонидан ушбу техникаларни ҳудудий давлат ўрмон хўжаликларига топшириш маросими ўтказилди. Тадбирда Ўрмон агентлиги директори Эркин Муҳиддинов, агентлик вакиллари, ҳудудий мутахассислар ва оммавий ахборот воситалари иштирок этди.

 

Кириш сўзида Агентлик директори Эркин Муҳиддинов ўрмонларнинг экологик барқарорликни таъминлашдаги ўрнига тўхталиб, соҳада амалга оширилаётган ислоҳотлар ходимлардан янада катта масъулият талаб этишини таъкидлади.

 

Шунингдек, тақдим этилган техникалар ўрмон ва адир шароитларига мослашган бўлиб, улар 16 хил вазифани бажариш имкониятига эга. Эндиликда мазкур махсус техникалар ёрдамида республика ҳудудларида яшиллик даражаси оширилади, ўрмон майдонлари кенгайтирилади ва “Яшил макон” умуммиллий лойиҳаси изчил давом эттирилади. Бу эса экологик барқарорликни таъминлаш имкониятларини янада кенгайтиради.