Тошкентда Афғонистон парламентининг собиқ депутати қўлга олинди
Аббос Иброҳимзода 350 минг доллар гаров пули қўйганига қарамай ҳибсда қолмоқда.
Афғонистон парламентининг собиқ спикери ўринбосари ва йирик тадбиркор Аббос Иброҳимзода Тошкентда қўлга олинди. Бу ҳақда Amu нашри хабар берди.
Балх вилоятидан сайланган собиқ депутат бизнесдаги рақибларининг кўплаб шикоятлари ортидан ҳибсга олингани билдирилмоқда. У 350 минг доллардан ортиқ гаров пули қўйганига қарамай, ҳануз ҳибсда қолмоқда.
Маълум қилинишича, Иброҳимзода асос солган Ibrohimzada Group йигирмадан ортиқ компанияни бирлаштирган, Балхдаги хусусий телеканални назорат қилган, шунингдек, таълим ва хайрия соҳаларига ҳам сармоя киритган. Гуруҳнинг хайрия жамғармаси аёллар саводхонлигини ошириш билан шуғулланган.
Ўзбекистон расмийлари ҳозирча мазкур қўлга олиш юзасидан изоҳ бермаган.
Эслатиб ўтамиз, Ўзбекистон ва Афғонистон ўтган йили тадбиркорларга кўмаклашиш мақсадида қўшма ваколатхона очган бўлиб, бу транспорт, логистика, савдо ва саноат соҳаларида ҳамкорликни кенгайтиришга хизмат қилиши кутилмоқда.
