Туркияда ўзбекистонлик аёл ишлаётган уйида ўлик ҳолда топилди
Аввалроқ Туркияда яна бир ўзбекистонлик аёлнинг жасади топилгани ҳақида хабар берилган эди.
Туркияда ишлаётган 40 ёшли Ўзбекистон фуқароси яшаб турган хонадонда вафот этган ҳолда топилди. Ма’лум қилинишича, у кекса эр-хотинга қаравчи сифатида ишлаган ва воқеа уларнинг уйида содир бўлган.
Гувоҳларнинг сўзларига кўра, аёлнинг жасади боғ ҳудудида аниқланган. Тез ёрдам ходимлари воқеа жойига етиб келганида унинг ҳаёт белгиларисиз эканини тасдиқлашган. Шунингдек, воқеа жойида полиция ва прокуратура ходимлари ҳам иш олиб борган.
Ҳозирда ҳолат юзасидан тергов ҳаракатлари давом этмоқда. Марҳуманинг жасади суд-тиббий экспертизаси ўтказиш учун Анқарага юборилди.
Эслатиб ўтамиз, бундан аввалроқ Туркияда яна бир ўзбекистонлик аёлнинг жасади топилгани ҳақида хабар берилган эди. Ўша воқеа бўйича гумонланувчи шахс Ўзбекистонда қўлга олинган.
