Ўзбекистонда дам олиш кунлари кўп қаватли уйларда таъмирлаш ишлари тақиқланиши мумкин

Ўзбекистон Олий Мажлиси Қонунчилик палатаси депутатлари “Аҳолини зарарли шовқинлардан ҳимоя қилиш тўғрисида”ги қонун лойиҳасини маъқуллаб, уни Сенатга йўллади. Ушбу ҳужжат аҳолининг тинчлигини таъминлаш, зарарли шовқинларга қарши курашиш ва дам олиш ҳуқуқини ҳимоя қилишга қаратилган.

 

Қонун лойиҳасига кўра, дам олиш ва байрам кунларида кўп қаватли уйларда реконструкция, таъмирлаш ёки қурилиш ишлари ўтказиш тақиқланади. Иш кунларида эса бундай фаолият фақат соат 9:00 дан 18:00 гача рухсат этилади.

 

Бундан ташқари, тинчликни бузиш тақиқланган вақт оралиғи ҳам кенгайтирилмоқда:

 

— иш кунларида — 23:00 дан 07:00 гача (илгари 23:00–06:00 эди);

— дам олиш ва байрам кунлари — 22:00 дан 09:00 гача.

 

Ҳужжатда тинчликни бузган шахслар ва ташкилотларга нисбатан маъмурий жавобгарлик кучайтирилиши, шунингдек, зарарни суд тартибида қоплаш тартиби белгиланиши назарда тутилган. Шовқин манбаини бартараф этиш мажбурий бўлиб, товонсиз бу мажбурият бекор қилинмайди.

 

Шунингдек, рухсат этилган даражадан юқори шовқин кузатилган ишлаб чиқариш объектларида фаолият юритаётган ходимларга меҳнат қонунчилигига мувофиқ оширилган иш ҳақи тўланади. Қоидабузарликлар мунтазам такрорланса, корхона фаолияти вақтинча тўхтатилиши мумкин.

 

Депутатлар ушбу ташаббус фуқароларнинг осойишта ҳаёт кечириш, соғлом психологик муҳитда яшаш ва дам олиш ҳуқуқини ҳимоя қилишини таъкидлашди. Қонун Сенат томонидан маъқулланса ва Президент томонидан имзоланса, янги тартиблар амалий кучга киради.