Фарғонада даладан 4 кило “опий” олаётганлар ушланди
Улар кейинчалик трансчегаравий “наркогуруҳ”га аъзо экани аниқланган.
Фарғона вилоятининг Данғара туманида ўтказилган тезкор тадбир давомида далага яширилган опийни олаётган уч нафар шахс ушланди. Бу ҳақида Ички ишлар вазирлиги хабар берди.
Қайд этилишича, тадбир Ички ишлар вазирлиги, Давлат хавфсизлик хизмати ва Божхона хизмати ходимлари ҳамкорлигида ўтказилган. Қўқон–Тошкент автомагистраль йўли четидаги дала майдонига кўмилган полиэтилен ўрамлардаги 4 килограмм опий моддаси ашёвий далил сифатида расмийлаштирилган.
Суриштирув давомида ушбу шахсларнинг аввал ҳам гиёҳвандлик жиноятлари учун жавобгарликка тортилгани маълум бўлган. Улардан бири — 1997 йилда туғилган аёл, яна икки нафари эса 1989 ва 1974 йилларда туғилган эркаклар бўлиб, улар Тожикистон ва Қирғизистонда ҳам фаолият юритувчи трансчегаравий “наркогуруҳ”га аъзо экани аниқланган.
Мазкур ҳолат юзасидан Жиноят кодексининг 246 ва 273-моддалари бўйича жиноят иши қўзғатилган. Ҳозирда ушбу гуруҳнинг қолган аъзоларини аниқлаш ва қўлга олиш бўйича тезкор чора-тадбирлар давом этмоқда.
