Андижон–Истанбул йўналишида тўғридан-тўғри авиақатновлар йўлга қўйилади
Андижондан ҳозирча Россиянинг бир нечта шаҳарларига парвозлар мавжуд, йўналишлар сони босқичма-босқич кенгайтирилади.
Транспорт вазирлиги матбуот хизмати маълум қилишича, 2025 йил 27 октябрдан бошлаб “Ўзбекистон ҳаво йўллари” миллий авиакомпанияси Андижон ва Истанбул шаҳарларини боғловчи тўғридан-тўғри мунтазам парвозларни йўлга қўяди.
Парвозлар ҳафтасига икки марта — душанба ва пайшанба кунлари амалга оширилади. Қатновларга оид батафсил жадвал ҳамда чипта нархлари “Ўзбекистон ҳаво йўллари”нинг расмий веб-сайтида эълон қилинади.
Транспорт вазирлигининг қайд этишича, Андижон аэропортидан ҳозирда Россиянинг бир қатор йирик шаҳарларига — Москва, Санкт-Петербург, Новосибирск, Иркутск ҳамда Тошкент йўналишларига мунтазам рейслар амалга оширилмоқда. Келгусида бу рўйхатни кенгайтириш режалаштирилган.
Маълумки, жорий йилда Андижон халқаро аэропорти тўлиқ реконструкция қилинди. Янги учиш-қўниш йўлаги қурилиши натижасида эндиликда аэропорт Boeing 747 ва Airbus A330 каби йирик самолётларни ҳам қабул қилиш имкониятига эга бўлди.
