Ўзбекистонда муддати ўтган маҳсулотлар савдосига нисбатан жарималар оширилади

Президент Шавкат Мирзиёев томонидан Рақобат қўмитасининг яроқлилик муддати ўтган маҳсулотларни сотиш учун жавобгарликни кучайтириш ҳақидаги таклифи маъқулланди. Мазкур ташаббус истеъмолчилар хавфсизлигини таъминлаш ва сифатсиз маҳсулотлар савдосига чек қўйишга қаратилган.

 

Амалдаги Маъмурий жавобгарлик тўғрисидаги кодекснинг 178-моддасига кўра, ҳозирда жисмоний шахслар учун жарима миқдори 3–10 баравар (1,23–4,2 млн сўм), мансабдор шахслар учун эса 7–10 баравар (2,88–4,2 млн сўм) миқдорда белгиланиб келинмоқда. Янги ўзгартишларга мувофиқ, энг юқори жарима 30 баравар — яъни 12,36 миллион сўмгача оширилади.

 

Рақобат қўмитаси томонидан истеъмолчилар ҳуқуқларини ҳимоя қилиш мақсадида “Истеъмолчи шикояти” номли онлайн тизим жорий этилади. Ушбу тизим орқали харидорлар яроқсиз ёки сифатсиз маҳсулотлар бўйича мурожаат юбориши мумкин бўлади. Шикоятлар барча босқичларда кузатилиб, Солиқ қўмитасининг шахсий кабинет тизими билан интеграция қилинади.

 

Мурожаат дастлаб тадбиркорнинг ўзи томонидан 10 кун ичида кўриб чиқилади. Агар муаммо ҳал этилмаса, иш Рақобат қўмитаси ёки истеъмолчилар ҳуқуқларини ҳимоя қилувчи ташкилотларга юборилади. 10 кун ичида чора кўрилмаган тақдирда, масала суд ёки тегишли давлат органи кўриб чиқишига ўтказилади.

 

Шунингдек, озиқ-овқат ва саноат этил спиртини ишлаб чиқариш ҳамда улардан фойдаланиш устидан назорат қилиш ваколатлари Рақобат қўмитасидан Бош прокуратура ҳузуридаги Иқтисодий жиноятларга қарши курашиш департаментининг Алкогол ва тамаки маҳсулотлари бозорини тартибга солиш инспекциясига ўтказилади.