Ўзбекистонда пуллик йўлларда тезлик 150 км/соатгача оширилади

Ўзбекистонда пуллик автомобиль йўлларида ҳаракатланиш тезлиги соатига 150 километргача рухсат этилиши режалаштирилмоқда. Бу ҳақда Олий Мажлис Қонунчилик палатасида ўтказилган муҳокамада Транспорт вазирлиги ҳузуридаги Автомобиль йўллари қўмитасининг бош юридик маслаҳатчиси Ҳасан Умаров маълум қилди.

 

Унинг сўзларига кўра, ҳозирда мамлакатдаги умумий фойдаланишдаги йўлларда максимал тезлик соатига 90 км этиб белгиланган бўлса, пуллик йўлларда ушбу кўрсаткич 150 км/соатгача оширилади.

 

“Автомобиль йўллари тўғрисида”ги янги қонун кучга киргач, Йўл ҳаракати қоидаларига ҳам мос ўзгартишлар киритилади. Жарима ва маъмурий чораларнинг тартиби оддий йўллардаги каби қолади”, — деди Умаров.

 

Мутаҳассиснинг қайд этишича, пуллик йўлларда ҳаракат хавфсизлигини таъминлаш мақсадида енгил автомобиллар ва юк транспорти учун алоҳида йўлаклар ташкил этилиши кўзда тутилмоқда. Бу чора хавфли қутиб ўтиш ҳолатларининг олдини олишга ёрдам беради.

 

Шунингдек, янги турдаги йўллар чорраҳа ва светофорлар билан тўқнашмайдиган, узлуксиз ҳаракатни таъминловчи конструкцияда қурилади.

 

“Йўллар кўприклар ва йўл ўтказгичлар орқали турли даражада кесишади. Бу эса тирбандликларни камайтиради ва транспорт оқимини силлиқ қилади”, — дея тушунтирди Ҳасан Умаров.