Қашқадарёда 1533 нафар фуқароларнинг уй-жойига нисбатан мулк ва ижара ҳуқуқлари расман эътироф этилди
Вилоятда ер майдонида ноқонуний қурилган иморатларни бартараф этиш тўғрисида 1097 та даъво аризалари киритилган.
Қашқадарё вилоятида жорий йилнинг ўтган 9 ой даври мобайнида ер участкаларини ўзбошимчалик билан эгаллаб олиш ва ушбу ер участкаларида ноқонуний иморат қурилишига оид 2326 та ҳолатда 370 гектардан зиёд ер майдонида қонунбузарлик ҳолатлари аниқланди.
Вилоятда ер қонунбузилиш ҳолатларини бартараф этиш бўйича ўтказилган профилактик тадбирлар натижасида ер қонунбузилиш ҳолатларининг 1091 таси 279 гектаридаги ҳолатлар фуқаролар томонидан ихтиёрий бартараф этилди. Фуқаролик ишлари бўйича судларга ер участкаларини ўзбошимчалик билан эгалланган ер майдонида ноқонуний қурилган иморатларни бартараф этиш тўғрисида 1097 та даъво аризалари киритилган.
Шунингдек, вилоятда кадастр хизматларини кўрсатиш борасида ҳам амалий ишлар йўлга қўйилган. Ўтган 9 ой давомида Давлат кадастрлари палатаси Қашқадарё вилояти бошқармасининг туман, шаҳар филиалларига келиб тушган мурожаатлар асосида 36 640 нафар жисмоний ва юридик шахсларга тегишли бўлган ер участкалари ва кўчмас мулкларига кадастр паспортлари тайёрланиб, давлат хизматлари марказлари орқали мулкдорларга тақдим этилди.
Натижада уларнинг ҳуқуқлари қонуний мустаҳкамланди. Бу дегани – минглаб оилалар энди мулкини сотиш, рўйхатдан ўтиш, мерос ва ҳадя билан боғлиқ қарорларни ҳеч қандай тўсиқларсиз амалга ошира олади.
Бундан ташқари 3 165 та (466,6 гектар) бўш ер участкалари аниқланган. Бўш ер участкалари «ЕРEЛEКТРОН» тизимига киритилган ва тегишли ташкилотлар томонидан ижобий хулосалар берилган 283 гектардан зиёд ер участкалари мулк ва ижара ҳуқуқи асосида аукцион савдоларига чиқарилди.
Ўтган давр ичида 50 990 та кўчмас мулкка бўлган ҳуқуқлар давлат рўйхатидан ўтказилди.
937- сонли Қонун ижроси юзасидан Қашқадарё вилоятида хатлов ишлари амалга оширилмоқда. Жараёнларга 200 нафарга яқин кадастр ходимлари сафарбар қилинган бўлиб, бугунги кунга қадар 60 мингдан зиёд кўчмас мулк объектлари хатловдан ўтказилди.
Олиб борилган хатлов ишлари натижасида Халқ депутатлари вилоят Кенгашининг сессияларида 1533 нафар фуқароларнинг уй-жойига нисбатан мулк ва ижара ҳуқуқлари расман эътироф этилди.
