2026 йил учун илмий кадрлар тайёрлаш бўйича қабул квоталари тасдиқланди
Янги қабул квоталари илмий соҳада инновацияларни кенгайтириш ва замонавий технологияларни ривожлантиришга йўналтирилган.
Илмий кадрлар тайёрлашнинг устувор йўналишларини инобатга олган ҳолда, 2026 йил учун стажёр-тадқиқотчилик, таянч докторантура ва докторантурада ўқитиш бўйича қабул квотаси тасдиқланди.
2026 йил учун илмий кадрлар тайёрлашнинг устувор йўналишлари:
1. Рақамли ва ахборот технологиялари, жумладан сунъий интеллект, киберхавфсизлик, маълумотлар таҳлили ва рақамли ечимларни ишлаб чиқиш;
2. Атом ва қайта тикланувчи энергия манбалари, жумладан водород технологиялари, энергия тежамкорлиги ва энергияни сақлаш тизимлари;
3. Агроинновациялар ва озиқ-овқат хавфсизлиги, уруғчилик, селекция, ген технологиялари;
4. Тиббиёт ва биотехнологиялар, жумладан биомедицина, генетика, фармацевтика, телемедицина ва юқумли касалликларни олдини олиш;
5. Сув ресурсларидан оқилона фойдаланиш ва иқлимга барқарорликни таъминлаш, жумладан чўлланишнинг олдини олиш ва иқлим ўзгаришига мослашиш;
6. Янги материаллар ва илғор ишлаб чиқариш технологиялари, жумладан нанотехнологиялар, аддитив ишлаб чиқариш, робототехника ва автоматлаштирилган тизимлар;
7. Сейсмик хавфсизликни таъминлаш соҳасида тадқиқотлар олиб бориш.
Олий таълимдан кейинги таълимнинг барча шакллари ва стажёр-тадқиқотчилик учун ҳужжатлар қабули 2025 йил 5 ноябргача давом этади.
