2026 йилдан энг кам ойлик иш ҳақи уч томонлама комиссия томонидан шакллантирилади
Ўзбекистонда энг кам иш ҳақини белгилашнинг янги тизими жорий этилади.
Ўзбекистонда 2026 йилдан эътиборан энг кам иш ҳақини белгилаш тартиби янгиланади. Шу мақсадда Касаба уюшмалари федерацияси, Бандлик ва меҳнат муносабатлари вазирлиги ҳамда Иш берувчилар конфедерацияси вакилларидан иборат Ижтимоий-меҳнат масалалари бўйича уч томонлама Республика комиссияси ташкил этилади.
Мазкур комиссия келгусида энг кам ойлик иш ҳақини белгилашга доир қонун лойиҳаларини тайёрлашда бевосита иштирок этади. Ушбу механизм меҳнаткашларнинг манфаатларини кенгроқ ҳимоя қилиш ҳамда иқтисодий ислоҳотлар билан уйғун равишда фаровонликни оширишга хизмат қилади.
Президент Шавкат Мирзиёев Ўзбекистон касаба уюшмалари ташкилотлари раҳбарлари ва фахрийлари билан учрашувда янги тизимни жорий этиш заруратини асослаб берди. Давлат раҳбари сўнгги йилларда энг кам иш ҳақини ошириш масалалари кўпинча давлат идоралари томонидан бир томонлама ҳал этилганини қайд этиб, эндиликда бу жараён ижтимоий шериклик асосида амалга оширилишини таъкидлади.
Шунингдек, Президент аҳолининг реал даромадларини ошириш, ҳар бир фуқаронинг уй-жой, таълим, соғлиқни сақлаш ва транспорт каби асосий эҳтиёжларини қондириш учун зарур иқтисодий шароит яратиш муҳимлигини алоҳида қайд этди.
