Тошкент вилоятида “севги учун” машина ўғирлаган эркак 12 йилга қамалди
Қамоқдан қочган эркак аёл билан бирга яшаш учун машина ўғирлаган.
Чирчиқ шаҳрида илгари бир неча бор судланган эркак яна оғир жиноят содир этгани учун 12 йил муддатга озодликдан маҳрум қилинди. Олий суд маълумотларига кўра, 33 ёшли шахс Жиноят кодексининг 169-моддаси (“Ўғирлик”) ва 267-моддаси (“Транспорт воситасини ўғирлаш”) бўйича айбдор деб топилган.
Терговда аниқланишича, эркак жиноят содир этган пайтда Манзил қамоқ колониясида жаза муддатини ўтаётган бўлган. Қамоқхона маъмурияти топшириғига кўра, у вақтинчалик муассасадан ташқарида ишлашга юборилган. Шу ерда у бошқа маҳбус аёл билан танишган ва улар ўзаро яқин муносабат ўрнатган. Кейинчалик жуфтлик қочишга қарор қилган.
Озодликка чиққач, улар яшаш жойи топа олмаган ва моддий қийинчилик сабаб яна жиноят йўлига қайтган. Айбланувчи Чирчиқда йўл четида носозлик сабаб тўхтаб қолган автомашинани кўриб, эгасига “ёрдам бериш” баҳонасида машинани ўғирлаб кетган. Транспорт воситасидан қимматбаҳо буюмларни олиб, автомашинани яқин атрофдаги мактаб ёнида ташлаб кетган.
Суд эркакнинг илгари олти марта судланганини, у такроран ва ўта хавфли жиноят содир этганини инобатга олиб, 12 йил муддатга озодликдан маҳрум этиш ҳақида ҳукм чиқарди.
