Павел Дуров Луврдан ўғирланган буюмларни сотиб олмоқчи
У бу воқеани “Франциядаги таназзул” сифатида баҳолади.
Telegram мессенжери асосчиси Павел Дуров бир неча кун аввал Париждаги Лувр музейидан ўғирланган қимматбаҳо буюмларни сотиб олиб, уларни “Абу-Даби” музейига топширишга тайёр эканини билдирди.
Дуров ижтимоий тармоқдаги постида бу воқеани “Франциядаги таназзул ва маданий заифлик белгиси” сифатида баҳолади. Шу билан бирга, у ҳукуматни мамлакатнинг ҳақиқий муаммоларига эътибор қаратишга чақирди ва маданий меросни ҳимоя қилиш муҳимлигини таъкидлади.
Луврда содир бўлган ўғирликда бир неча асрлик қимматбаҳо заргарлик буюмлари ва тарихий буюмлар олиб кетилган. Ҳуқуқ-тартибот органлари ҳозирда воқеани тергов қилмоқда, музей вақтинча ёпилган. Экспертлар буюмларни топиш қийин бўлиши мумкинлигини айтмоқда.
Дуровнинг таклифи интернетда катта баҳсларга сабаб бўлди. Айримлар уни маданий меросни сақлашга қаратилган жавобгарлик сифатида қабул қилса, бошқалар бу ташаббусни “PR ҳаракати” ёки ҳуқуқий жиҳатдан шубҳали қадам деб баҳолади.
Франция ҳукумати ҳозирча Дуровнинг баёнотига расмий муносабат билдирмаган, аммо Лувр маъмурияти хавфсизлик чораларини кучайтираётганини маълум қилди.
