Тошкент ва Россия шаҳарларида “Палов фестивали” бошланди

20 октябрь куни Тошкент шаҳридаги “Лали” ўзбек таомлари ресторанида Novikov Group ва Family Garden ошхона иттифоқи ташаббуси билан “Палов фестивали” старт олди. Мазкур гастрономик тадбир бир вақтнинг ўзида тўрт шаҳарда — Тошкент, Сочи, Красная Поляна ва Воронежда ўтказилмоқда. Фестиваль Ўзбекистоннинг бой ошпазлик меросини ҳамда ЮНЕСКО номоддий маданий мероси рўйхатига киритилган миллий таом — паловнинг рамзий аҳамиятини кенг тарғиб этишга қаратилган.

 

Фестиваль доирасида “Лали” ресторанлари меҳмонлари уч ҳафта давомида Ўзбекистоннинг турли ҳудудларига хос палов турларини татиб кўриш имконига эга бўлади. Бренд-ошпаз Руслан Италмазов бошчилигидаги жамоа мамлакатнинг гастрономик анъаналарини акс эттирувчи еттита нойоб палов турини тайёрлади.

 

Шулардан айримлари:

 

Чойхона оши — думба ёғида қўй гўшти ва зирк билан тайёрланиб, пиширилган саримсоқ, маринадланган тоғ пиёз ва ғуроб билан тортилади.

 

Фарғонача палов — мол гўшти, қизил гуруч ва кавартак қўшилган, сузма ва яшил турп билан дастурхонга тортилади.

 

Кабули оши — мол гўшти, ноъхат ва майиз билан пиширилади, “Шакароб” салати билан бирга берилади.

 

Самарқандча уй оши — бехи ва мол гўшти билан тайёрланиб, айрон ва аччиқ қалампир билан уйғунликда тақдим этилади.

 

“Уч қудуқ” палови — мол ва қўй гўшти, анор доналари билан тайёрланиб, помидор шарбатида тайёрланган тузлама бодринг билан тортилади.

 

“Палов фестивали” 2025 йил 9 ноябргача давом этади ва барча “Лали” ресторанларида бир вақтнинг ўзида ўтказилади. Ташкилотчиларнинг таъкидлашича, лойиҳа ўзбек ошхонасининг бойлиги ва маданий хилма-хиллигини халқаро миқёсда танитиш мақсадини кўзлайди.