Тошкентда “мулла” ниқобидаги эркак аёлларга шилқимлик қилди
Ўзини мулла деб таништирган эркак аёлларга нисбатан номақбул ҳаракат қилгани учун беш суткага қамалди.
Пойтахтнинг Янгиҳаёт туманида яшовчи 33 ёшли эркак ўзини мулла сифатида таништириб, маросим вақтида аёл ва унинг жиянига нисбатан жинсий тусдаги ҳаракатлар содир этганликда айбдор деб топилди.
Маълум қилинишича, ҳодиса 14 октябрь куни “Янги турмуш” маҳалласида содир бўлган. Аёл ёмон туш кўргач, танишининг тавсияси билан уйидан “дуо ўқиб бериш” учун эркакни чақиртирган. У ўзини мулла сифатида таништириб, маросим учун 3,6 миллион сўм талаб қилган.
Аммо маросим давомида у аёл ва унинг вояга етган жиянига нисбатан одобсиз хатти-ҳаракатлар қилган. Жабрланувчилар воқеадан сўнг дарҳол ҳуқуқ-тартибот органларига мурожаат этган.
Суд жараёнида эркак ўз айбини тан олиб, қилган ишидан пушаймонлигини билдирган. Суд унинг ҳаракатларини Маъмурий жавобгарлик тўғрисидаги кодекснинг 41-1-моддаси (“Жинсий зўравонлик”) билан малакалаб, беш суткага маъмурий қамоқ жазоси тайинлади.
Шунингдек, унга ушлаб туриш билан боғлиқ харажатларни қоплаш мақсадида 309 минг сўм ундириш белгиланди.
