Тошкентда кинолог ва унинг садоқатли хизмат итига ҳайкал қўйилди
Миллий кинология марказида хизмат бурчини шараф билан адо этган кинологлар хотирасига бағишлаб “Хотира мажмуаси” очилди.
Ўзбекистон Республикаси Божхона қўмитаси ҳузуридаги Миллий кинология марказида хизмат бурчини адо этиш жараёнида фидокорона меҳнат қилган кинологларнинг хотирасини абадийлаштириш мақсадида “Хотира мажмуаси” барпо этилди.
Янги мажмуанинг очилиш маросимида Божхона қўмитаси раҳбарияти, Миллий кинология марказининг ташкил топишида бевосита ҳисса қўшган фахрийлар, марказ ходимлари ҳамда марҳум кинологларнинг оила аъзолари иштирок этишди.
Тадбирда Божхона қўмитаси раиси Акмал Мавлонов сўзга чиқиб, сўнгги йилларда Президентимиз томонидан божхона тизимини модернизация қилиш ва техник базасини мустаҳкамлаш борасида амалга оширилаётган кенг кўламли ислоҳотлар Миллий кинология марказида ҳам ўз самарасини бераётганини таъкидлади.
Мазкур марказ Жаҳон божхона ташкилотининг минтақавий мақомига эга бўлиб, сўнгги уч йил давомида божхона органларининг 460 нафар, бошқа ҳуқуқни муҳофаза қилувчи идораларнинг 210 нафар ҳамда хорижий давлатларнинг 50 нафар кинологи ушбу марказда малака оширган.
Бугунги кунда Миллий кинология маркази Туркия, Жанубий Корея, Озарбайжон, Қозоғистон, Латвия, Литва, Буюк Британия ва Россия каби давлатларнинг кинология хизматлари билан фаол ҳамкорликни йўлга қўйган.
Маълумотларга кўра, 2023–2024 йиллар ва жорий йилнинг тўққиз ойида хизмат итлари ёрдамида 10 тонндан ортиқ гиёҳвандлик воситалари ҳамда 44 килограмм кучли таъсир қилувчи моддаларнинг ноқонуний айланиши фош этилган. Ушбу натижаларга эришишда марҳум кинологларнинг ҳам ўзига хос ҳиссаси борлиги қайд этилди.
Марказ ҳудудида қад ростлаган “Хотира мажмуаси” уларнинг хотирасига ҳурмат ифодаси бўлиб, кинолог ва унинг садоқатли ити тасвири акс этган ҳайкал мажмуанинг рамзий марказига айланган. Тантанали маросимда рамзий тасма кесилиб, ҳайкал пойига гулчамбарлар қўйилди.
Эслатиб ўтамиз, Миллий кинология маркази 24 октябрь куни ўзининг 29 йиллик фаолиятини нишонлайди. Шу муносабат билан бир гуруҳ фидокор ходимлар Божхона қўмитаси раиси томонидан фахрий ёрлиқлар ва эсдалик совғалари билан тақдирланди.
