Тошкентда журналистлар куч билан ИИБга олиб кетилгани айтилмоқда

Тошкент шаҳри ИИББ ахборот хизмати хабарга кўра, ижтимоий тармоқларда “Taftish.uz” интернет нашри мухбирлари билан боғлиқ воқеа бўйича тарқатилаётган айрим хабарлар асоссиздир.

 

23 октябрь куни Юнусобод тумани прокуратураси томонидан ўтказилган сайёр қабул чоғида мазкур нашр вакиллари ҳамда қабулга келган айрим фуқаролар ўртасида келишмовчилик юзага келган.

 

Ҳолат бўйича фуқароларнинг 102 қисқа рақамига қилган мурожаати асосида воқеа жойига етиб борган ички ишлар ходимлари вазиятни аниқлаштириш мақсадида томонларни туман ИИБ биносига олиб бориб, суҳбат ўтказган.

 

Ҳозирда мазкур ҳолат юзасидан ўрганиш ишлари давом этмоқда.

 

Ички ишлар органлари билдиришича, уларнинг ҳаракатлари қонуний ҳуқуқий тартибда, жамоат жойида юзага келган можаронинг сабаблари ва иштирокчиларини аниқлашга қаратилган бўлиб, ОАВ вакилларининг фаолиятига тўсқинлик қилиш билан ҳеч қандай алоқаси йўқ.

 

Тегишли идора “Taftish.uz” нашрига жамоатчиликни чалғитувчи, “журналистларга суиқасд”, “зўравонлик ишлатилди”, “асоссиз олиб кетилди”, “ускуналар шикастланди” каби асоссиз маълумотларни тарқатмасликни сўраб мурожаат қилган.

 

Аввалроқ “Taftish.uz” интернет нашри журналистлари ИИБга олиб кетилгани ҳақида хабарлар тарқалганди.