Андижонда ҳайдовчининг ухлаб қолиши оқибатида икки автомобиль тўқнашиб кетди
Ҳайдовчи ухлаб қолиб, бошқарувни йўқотган ва қарама-қарши йўналишга чиқиб кетган.
Андижон вилояти Олтинкўл туманида ҳайдовчининг ухлаб қолиши оқибатида икки автомобиль иштирокида йўл-транспорт ҳодисаси рўй берди. Бу ҳақда вилоят ИИБ Йўл ҳаракати хавфсизлиги бошқармаси хабар берди.
Расмий маълумотларга кўра, ҳодиса 23 октябрь куни соат 13:15 атрофида туман ҳудудидаги “Оқтепа” маҳалласи орқали ўтувчи D-105 “Фарғона ҳалқа йўли”нинг 132-километрида юз берган.
1990 йилда туғилган ҳайдовчи В.М. бошқарувидаги Nexia-3 автомашинаси билан ҳаракатланаётган вақтда ухлаб қолиб, бошқарувни йўқотган. Натижада у йўлнинг қарама-қарши йўналишига чиқиб кетиб, қарши томондан ҳаракатланаётган Nexia русумли автомобиль билан тўқнашган.
Тўқнашув оқибатида Nexia-3 автомобилининг бир йўловчиси тан жароҳати олиб, туман тиббиёт бирлашмасига мурожаат қилган.
Ҳозирда мазкур ҳолат юзасидан Олтинкўл тумани ИИБ Йўл ҳаракати хавфсизлиги гуруҳи томонидан суриштирув ишлари олиб борилмоқда.
