Давлат кам таъминланган оилаларнинг хусусий боғча тўловларининг 40 фоизини қоплайди
Маблағлар бевосита хусусий оилавий боғчаларга ўтказилади.
Ўзбекистонда кам таъминланган оилаларнинг фарзандлари хусусий мактабгача таълим муассасаларига қатнаганда, давлат уларнинг тўлов харажатларини қисман қоплаб беради. Бу тартиб Адлия вазирлигида 2025 йил 23 октябр куни 3693-сон билан рўйхатдан ўтган янги низомда белгилаб қўйилди.
Янги тизимга кўра, компенсация миқдори давлат болалар боғчаларида тўланадиган тўққиз соатлик кунлик тўлов миқдорининг 40 фоизини ташкил этади. Ушбу маблағлар тўғридан-тўғри кам таъминланган оилалар фарзандларини қабул қилган хусусий оилавий боғчаларга йўналтирилади.
Компенсация олувчи оилалар рўйхати махсус ахборот тизими орқали автоматик шакллантирилади, бу эса жараённинг шаффоф ва тезкор бўлишини таъминлайди.
Шунингдек, хусусий боғчалар учун ажратиладиган бундай жойлар сони уларнинг Мактабгача ва мактаб таълими вазирлиги билан тузилган шартномасидаги умумий қабул квотасининг 15 фоизидан ошмаслиги белгиланган.
