Россиядан оғир аҳволга тушган етти фарзандли ўзбекистонлик аёл Ватанга қайтарилди
Аёл ҳужжатларсиз яшаб келгани учун маҳаллий полиция томонидан қўлга олинган.
Россиянинг Самара вилоятида оғир аҳволга тушиб қолган Ўзбекистон фуқароси ва унинг етти нафар фарзандига мамлакатимизнинг Россиядаги Бош консуллиги томонидан амалий ёрдам кўрсатилди.
Бош консуллик маълумотига кўра, аёл шахсини тасдиқловчи ҳужжатларсиз яшаб келгани сабабли маҳаллий полиция томонидан қўлга олинган. У хорижий фуқароларни вақтинча сақлаш марказига жойлаштирилган, фарзандлари эса вояга етмаганлар учун мўлжалланган муассасага топширилган.
Дипломатик ваколатхона ходимлари Самара вилоятидаги тегишли идоралар билан музокаралар олиб бориб, она ва фарзандларини бирлаштириш ҳамда уларни Ватанга қайтариш бўйича келишувга эришди.
Натижада оила Самара–Тошкент йўналиши бўйича авиарейсда Ўзбекистонга қайтарилди.
Бундан аввал ҳам Олмаотада қаровсиз қолган беш нафар ўзбекистонлик бола дипломатик ёрдам орқали юртга олиб келинган эди.
